المحرر
m_ fathala 2 @yahoo. com

مأدبة غداء عمل علي إحدي المراكب النيلية العائمة اقيمت الاسبوع الماضي وجمعت الدكتور احمد نظيف رئيس الوزراء والدكتور يوسف بطرس غالي "ناظر" المالية والمهندس رشيد محمد رشيد وزير الصناعة والتجارة والمهندس لطفي منصور وزير النقل والمهندس احمد المغربي وزير الاسكان والمرافق إلي جانب 15 من اشهر رجال الاعمال يتقدمهم المهندس نجيب ساويرس والمهندس احمد عز ومحمد ابوالعينين.
داعب د. نظيف الضيوف قائلاً: لو المركب لاقدر الله غرق في النيل لغرقت معاه الرأسمالية المصرية!!
رد احد الضيوف وقال: دي ثروة مصر كلها علي المركب يافندم!!
وبعيدا عن الاجتماع السري الذي لم يصور ولم يعلن عنه.. لكن ماذا يحدث من حوار بين الضيوف لو وجه الدكتور نظيف الدعوة لعم عبده كحيان ممثل محدودي الدخل وزعيم الغلابة والمتحدث الرسمي باسم الفقراء وانضم إلي جلسة الاثرياء.. فلنبدأ الحوار..
د. غالي: تشرب ايه يا كحيان؟
عم عبده: نظر إلي كوب المهندس ساويرس وقال ياريت اشرب زي ساويرس بيه..
ساويرس: يا بني ده "كوكتيل فواكه" بس "الكيوي" زيادة شوية عشان فيها فيتامين "سي" عشان المناعة ضد البرد!
عم عبده: يا ريت آخد فاكهة بس من غير اللي قبلها ولا اللي بعدها عشان انا شفت الفاكهة قبل كده!! وخليني في اللي أنا عارفه.
ساويرس: أنا هطلب لك الفاكهة بس بعدما تقولي انت كارت ولا خط!
عم عبده: أنا باخد أكثر من خط عشان اوصل "لعزبة الورد" ودي منطقة عشوائية لكن عمري ما استخدمت "كارت" لأني مش معايا محفظة وأنا معروف و"العشة" اللي أنا ساكن فيها مالهاش عنوان. يبقي هشيل معايا كارت ليه يا بيه؟!
د. غالي: افرح يا عم عبده يا كحيان.. الحكومة هتدفع عنك الضريبة العقارية المستحقة عن "العشة" بس اياك "يتمر فيكم" وبدل ما هحجز عليها وتبيعها لو مادفعتش الضريبة!
عم عبده: يا معالي الوزير تاخدوا مني ضريبة ليه.. هو انا باخد من الحكومة حاجة.. ده أنا عاطل بالوراثة وعمري ما تعلمت ولا تعالجت عندكم والعشة لا فيها صرف صحي ولا مياه ولا أي مرافق والمنطقة بدون خدمات.. ده انا اللي محتاج منكم ضريبة بطالة ومرض وجهل وفقر!!
د. غالي للدكتور نظيف: اهوه عم عبده ده يا فندم نموذج لمحدودي الدخل "النمرود".. مش عاجبه اننا هندفع له الضريبة العقارية!
محمد ابوالعينين: طب تاكل ايه يا عم عبده.. انت بتحب "السي فود" زي ساويرس والا "السيمون فيميه" زي احمد عز والا بتحب "الاسكالوب بانيه" زي انا ما بحبه!..
عم عبده: انا عاوز فتة بالموزة ومعاها كوارع ! لأن الأسماء دي اعتقد هتطلع كبسولات أو محاليل!!
د. غالي: شايف يا فندم.. عينه فارغة.. وياكل "مال النبي".. انا عارفه وعارف امثاله.. المهم هو هياكل معانا ويشوف اللي بناكله!
المهندس لطفي منصور: احنا ممكن نقول له ان اكلنا ده اكل "عيانين" ومرضي.. والحمد لله انه مش هيعرف اكلنا ولا شافه قبل كده!
وصل الاكل.. وشاف عم عبده الكحيان طبق المهندس ساويرس "السي فود" وللأسف تعرف علي السمك والجمبري والاستاكوزا والسبيط.. فصرخ بصوت عال وهستيري وقال أنا عايز زي طبق ساويرس بيه.
ساويرس: يابني شوف حد غيري. انت باصصلي في كل حاجة ما تبص علي حد تاني!
عم عبده: يا ساويرس بيه احنا بنحبك عشان دايما بتقول لنا اتكلم من القلب. عشان كده انا بحب اتكلم معاك!
المهندس المغربي: انت ليه ساكن في عشة ما تيجي تاخد ارض في مشروع "ابني بيتك" وانا هعملك تسهيلات في السداد بس المهم تدفع المقدم! والا انت عايز فلوسك تفضل تحت البلاطة!
د. غالي: والله يا فندم عايزين نطلع قانون ونطلع لجان تفتيش علي بلاط الغلابة واكيد الحصيلة هتبقي كويسة!
أبوالعينين: وانا هساعدك وهبعت لك سيراميك الحمام والمطبخ.. المهم تدفع المقدم!
المهندس لطفي منصور: وانا هبعت لك كل يوم "عربية" توصلك من العبور إلي وسط البلد عشان تعمل "شوبنج" بس تدفع المقدم!
المهندس رشيد: وانا علي الأكل كل يوم.. هبعت لك زبادي علي الفطار والغداء والعشاء كمان.. بس تدفع المقدم!
عم عبده كحيان.. طب هو كام المقدم ده؟
المهندس المغربي: مش هيعدي 10 آلاف جنيه وهنعفيك من "القرعة".
عم عبده كحيان.. بعد تنهيدة كبيرة.. قال: "فوتر" خيركم يا حكومة!! وبعدها قفز عم عبده من المركب إلي النيل خوفا من دفع حساب الكوكتيل والسي فود!!
د. غالي.. طب يا فندم كنا خدنا منه ضريبة "قفز"!!