1. مجهول قال:
   فبراير 21st, 2008 at 21 فبراير 2008 3:32 م

   انا سالت عن الشقه يا جماعة وعرفت ان السعر بيوصل بعد الفوائد والتقسيط على 15 سنة الى حوالى 110 الف بالمقدم ومبلغ الدعم
   
   ياترى السعر دة مش كتير شوية على شقة 63 متر و الا معقول ؟
   
   و قالو أن الأسعار سوف تتغير بسبب أرتفارع أسعار الحديد
   
   و لسه محدش عارف زادت قد أيه

2. مجهول قال:
   فبراير 24th, 2008 at 24 فبراير 2008 1:52 ص

   انا روحت وإتفرجت

   بص لو هاتدفع كاش سعر الوحدة العلوية 65 الف

   واللى تحت ب75 ألف عشان الحديقة

   المساحة اعتقد حوالى 48 متر صغيرة جدا اوضتين وصالة صغيرة

   والمطبخ أمريكى مقطوع من الصالة

   تعالى بقى للعب فى الدفع

   عن طريق التمويل العقارى وهما بيبعتوك لشركة تبعهم

   تقولك فى الأول بعد ما تجيب مفردات المرتب والأوراق المطلوبة

   عايزين 800 جنية إستعلام عشان لو واخد قروض تانية ولا حاجة

   ودى فلوس رايحة

   برغم إن أى إستعلام فى ثانية من على الكمبيوتر فى البنك

   وعلى فكرة شركة التمويل موجود فى المهندسين برج أرواسكوم

   الى بجوار مسرح البالون تحت كوبرى 15 مايو بجوار البنزينة

   هاتف اوراسكوم المجانى
   
   08004440444
   
   0800444055

3. مجهول قال:
   فبراير 24th, 2008 at 24 فبراير 2008 5:02 م

   فلوس الاستعلام 300 جنيه بس والباقى تحت حساب ثمن الشقه وهما مصاريف طلب التمويل العقارى والاستعلام عن الشارى فى المنزل والعمل والاستعلام من البنك المركزى عن مقدم الطلب لو واخد اى قروض او مشترى حاجة بالتقسيط وعلى فكرة النهاردة كان اخر يوم فى انهاء جميع اجراءات المرحلة الاولى والمرحلة الثانية قالوا هتزيد حوالى 10 الاف جنية على الكاش

4. مجهول قال:
   فبراير 28th, 2008 at 28 فبراير 2008 5:40 م

   احنا روحنا واتفرجنا وبغض النظر عن المساحه المقدم كده وصل ل20ألف مش 15ألف ، يبقي فين التمويل اللي بيقولو عليه ، وده فوائد مركبه ، ومحدش قال بالنسبه لاللي معهوش مقدم وعايز يقسط يعمل ايه ، وفي الاخر هي متستهلش كل المبالغ ده هو انا هقعد في الجنينه ولا هقعد في مدينه الأنتاج الأعلامي هي بصراحه الشقه متفرقش حاجه عن شقق الشباب اللي بتعملها الحكومه وبيكون مقدمها 5ألاف بس ومن غير ايصالات أمانه ولاكمبيالات ده حتي حاجه تقلق .

5. مجهول قال:
   مارس 2nd, 2008 at 2 مارس 2008 8:52 ص

   على فكرة الشقه الى مقدمها خمسة الاف جنيه تقسيطها على 25 سنة وبقسط 160 جنية متزايد 7 % سنويا ولو حسبتها هتلاقى بردة سعر الشقه فى حدود 120-130 الف والنظام كلة دلوقتى بقا تمويل عقارى والحجز القديم ببنك التعمير والاسكان اتحول للتمويل العقارى بنفس النظام ايصالات وشيكات واستعلام وتوكيل غير قابل للالغاء وبعدين انت لما يبقى جنبك فنادق ودريم لاند وانتاج اعلامى فعلا انت مش هتقعد فيهم لكن المكان والمناخ والمستوى هيبقى كويس غير لما يبقى جنبك عشش صفيح ومصانع اسمنت ومناطق عشوائيه ومساكن زلازل ورشاح وترعه ومواقف مكروباصات فانت هنا بتشترى الموقع وليس الشقه بدليل ان الاستوديو مساحة 40 متر بدريم لاند ب250 الف والشقة 40 متر بابو النمرس ب10 الاف فالموقع عامل مهم جدا لتخطيط ومستقبل المنطقة لاحقا

6. مجهول قال:
   مارس 23rd, 2008 at 23 مارس 2008 7:20 ص

   مساحه الشقه الداخليه من غير الجنينه 45 متر فقط وفقط لا غير عباره عن
   
   حجرتين 3.1م * 3.1م
   
   حمام 1.9م * 1.9م
   
   مطبخ 2.5م * 2.5م
   
   صاله 3.7م * 3.7م
   
   طرقه 1م * 2م
   
   بيقى فين ال 63 متر الى بيقولوا عليها

7. مجهول قال:
   مارس 25th, 2008 at 25 مارس 2008 7:22 ص

   محدش قال صافى 63 متر انما اجمالى 63 متر لو صافى 63 متر كانت مساحة الشقه هتباه حوالى 85 متر فالوحده مبنيه على 126 متر بالضبط لو قسمتهم هتبقى الوحده 63 متراى ان الفرق رايح فى عرض الحوائط

8. مجهول قال:
   مارس 29th, 2008 at 29 مارس 2008 1:52 م

   ازاي الأسعار هتتغير بسبب الحديد و أصلا الشقق بنظام الحوائط الحاملة وبعدين ايه حكاية 300 جنيه لا ترد يعني بفرض المتقدم 50000 شخص سوف تجمع الشركة فوق ال 15 مليون مع أنها أخذت الأرض تقريبا بدون قيمة ومدعمة من الوزارة
   
   نريد صور للمشروع لان الصورة المنشورة تبين الموقع شكله ليس جيدا

9. taney قال:
   مارس 29th, 2008 at 29 مارس 2008 8:39 م

   الجديد ان المرحلة الثانية من المشروع نزلت مع العلم انها بواقى المرحلة الاولى وبزيادة قدرها 25000فىالشقة الارضى و20000للشقة العلوى فمبروك للي اشترى وريرزقنا ويرزق الى مشتراش حاجة احسن والاسعار الجديدة للشقة الارضى89000شيلمنهم 10000دعم فتكون الشقة بمبلغ 79000الف جنية و74000للعلوى بعد ماتشيل الدعمtamesayed@GMAIL.COM

10. مجهول قال:
    مارس 31st, 2008 at 31 مارس 2008 6:11 م

    ياجماعة دة لسة فيه 8 مراحل انا كنت هناك وسالت وعرفت الكلام الجديد دة والشقق غليت بقت اللي تحت 89000 واللي فوق 84000 والمقدم عالي بقي 47000 تقريبا علي مرتب 800 جنية يعني حرام ويعتبر احنا في اواخر المرحلة الاولي امال لما نوصل للمرحلة 4 هنعمل ايه مش ال8 مراحل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

11. مجهول قال:
    أبريل 6th, 2008 at 6 أبريل 2008 12:13 م

    شقة لعظيم! من جريدة المساء
    
    يسري حسان ysry_ hassan@yahoo.com
    
    أكيد تصدمك إعلانات الشقق التي تصل أسعارها إلي الملايين.. تقرأ الإعلان وتصاب بالذهول.. شقة لعظيم.. فرصة لن تتكرر.. الوحدات محدودة.. بادر بالحجز.. تسهيلات في السداد.. وعندما تقرأ السعر تحتار في الأصفار هل هي أربعة أم خمسة أم ستة.. إذا كنت ممن جاوزوا الأربعين. مثلي. ومازلت تحلم بشقة في الوراق أو بولاق الدكرور. تسارع حباً في الاستطلاع فقط إلي وضع نظارة القراءة لتكتشف أن الأصفار ستة وليست خمسة في عين العدو.
    
    الغريب أن الوحدات تنفد بسرعة فعلاً.. جربت أن أتصل بعد عدة أيام من نشر الإعلان فاعتذروا بأن الفرصة فاتتني.. فعلاً الفرصة فاتتني.
    
    قرأت إعلاناً عن شقق للشباب في إحدي المدن الجديدة.. اعتبرت نفسي شاباً وسارعت بالاتصال.. رد عليّ صوت جميل.. سألت عن المساحات قالت بحنان بالغ لدينا مساحات تناسب كل الشرائح.. قلبي دق دق.. قلت ماهي؟ قالت من 80 متراً وحتي ..240 خلينا في ال 80 ما سعرها أجابت 750 ألف جنيه طلبت منها أن تقرأ الرقم جيداً ربما لا وجود للصفر الأخير.. أخبرتني بأن الرقم صحيح وهناك تسهيلات في السداد تصل إلي عام ونصف العام.. قلت هذا كرم بالغ ولكني أطمع في المزيد هل يمكن تقسيط المبلغ علي عامين.. قلتها طبعاً علي سبيل السخرية.. ردت صاحبة الصوت الذي كله حنان مؤكدة أن هذه أقصي تسهيلات يمكن منحها وأن عليّ اغتنام الفرصة بأقصي سرعة ممكنة لأن الوحدات محدودة جداً والطلبات عليها لا تنقطع.
    
    أريد أن أغتنم الفرصة.. هل يدلني أحدكم علي الطريقة المثلي للسطو علي أحد البنوك؟

12. مجهول قال:
    أبريل 24th, 2008 at 24 أبريل 2008 12:24 م

    فضيحة جديدة تضرب مشروع مبارك القومي للاسكان، لكن هذه المرة بطل الفضيحة ليس وزارة الاسكان بمفردها وانما تتقاسم بطولة الفضيحة مع شركة اوراسكوم التي حصلت علي 40 فدانا في أفضل مناطق مدينة اكتوبر لتشارك فيما اسموه بمحور القطاع الخاص في المشروع القومي لإسكان الشباب وفقا للبرنامج الانتخابي للرئيس مبارك. تفاصيل الفضيحة كثيرة ومتعددة، لكننا سنبدأ من البداية. منذ ستة أشهر تقريبا وقعت شركة أوراسكوم اتفاقية مع وزارة الاسكان تقضي بحصول الشركة علي 40 فدانا تقع خلف مدينة الانتاج الاعلامي علي طريق الواحات البحرية بسعر رخيص جدا مقابل أن تبني مساكن للشباب مدعومة من الحكومة بـ 15 الف جنيه لكل وحدة سكنية علي نصف الارض وتبني الشركة مساكن استثمارية تباع وحداتها بالسعر الحر علي النصف الثاني من الأرض. الاتفاق يقضي أيضا بأن تبني اوراسكوم الارض كلها في مدة زمنية محددة مما يلزمها بالتزامن في البناء، الشباب مع الاستثماري حتي لا تقع في خطيئة “تسقيع” الارض المخصصة للوحدات الاستثمارية. الوحدة السكنية وفقا للاتفاق تكلفتها 50 الف جنيه تدعمها الدولة بـ 15 الف جنيه منحة لا ترد. الي هنا والاتفاق واضح وبسيط وسليم وان كان ينقصه جهة تشرف عليه. الفضيحة ظهرت عندما خرجت المباني للنور، وانكشفت اللعبة التي قررت أوراسكوم ان تضحك بها علي الجميع، بمن فيهم السادة كبارات وزارة الاسكان من وزيرها حتي خفرائها. لأول مرة في مشروع اسكان قومي مخصص له مليارات الجنيهات وتعمل خلفه وزارات مصر كلها وفقا لتوجيهات الرئيس مبارك ان يتم البناء بدون اساسات وبدون كمرات حاملة وبدون عمدان مسلحة وبدون حديد مسلح. لأول مرة يتم بناء مشروع قومي بنظام الحوائط الحاملة التي توقف عن بنائها الفقراء بعد ان وقعت علي رءوسهم كثيرا. هذه الحوائط الحاملة مبنية علي “فرشة” اسمنتية سمكها 9 سم فقط من المفترض ان تحمل مبني ارتفاعه ثمانية أمتار، نفس الحوائط الحاملة المكونة من الطوب الابيض ستحمل سقفا سمكه 9 سم فقط يحمل بالتبعية دوراً ثانيا من الحوائط الحاملة. لهذه الدرجة وصلت الاستهانة ببرنامج الرئيس وبحياة الناس وبعقول القائمين علي وزارة الاسكان، ومع ذلك ليت الامر توقف عند هذا الحد، بل إن المفاجأة الحقيقية هي تكلفة الوحدة بطريقة البناء هذه المخجلة، فقد كشف عقد من عقود مقاولي الباطن أن تكلفة المبني الواحد المكون من أربع شقق سكنية مساحة كل شقة 63 مترا محدد بـ 34 الف جنيه فقط يعني الشقة الواحدة تكلفتها لن تتجاوز الـ 8500 جنيه فقط. لهذه الدرجة يتم الاستهتار ببرنامج الرئيس وبحياة الناس وبعقول القائمين علي وزارة الاسكان، فلو علمنا أن السعر الذي حددته اوراسكوم للشقة الدور الارضي بـ60 الف جنيه والشقة بالدور العلوي بـ75 الف جنيه يضاف اليها فائدة سنوية علي التقسيط ترفع تكلفة الشقة 20 الف جنيه اخري يعني ذلك ان اوراسكوم كلفت المبني ثمانية آلاف وخمسمائة جنيه وستحصل علي ثمنها “الكاش” متوسط 67.5 الف جنيه أضف اليها 15 الف جنيه منحة لا ترد من الدولة للمشروع يكون اجمالي ما ستحصل عليه من المبني المكون من أربع وحدات سكنية 270 الف جنيه أضف اليها 60 الف جنيه منحة الدولة للشقق الاربع يكون الاجمالي 330 الف جنيه. يعني صافي الربح للشركة من المبني الواحد بعد خصم التكلفة الرهيبة 296 الف جنيه. يعني لو قامت اوراسكوم ببناء 500 مبني بهذه الطريقة ستحصل علي أرباح قدرها 148 مليون جنيه، يا بلاش والله. الأغرب من كل ما سبق ومن كل ما سيأتي أن اوراسكوم لم تشترط في مقاولي الباطن المسند اليهم اعمال البناء “العبيطة” أي سابق خبرة أو أي اشتراطات تضمن الجودة والسمعة فقط بطاقة ضريبية وتحصل علي عقد مقاولة لأي مبني بسعر 34 الف جنيه. هل هناك سر وراء هذه المهزلة؟ نعم سر بسيط جدا، هو أن مشروع اوراسكوم ليس عليه رقيب، لا جهاز مدينة اكتوبر ولا هيئة المجتمعات العمرانية ولا قطاع اسكان الشباب بالوزارة ولا حتي جهة محايدة من تل أبيب تضمن تنفيذ الاتفاق بتفاصيله الكثيرة. سؤال واحد نختم به هذه الفضيحة، هل كل المشاريع الاسكانية التي تتم في المدن الجديدة تنشأ بنفس الطريقة وبنفس الطناش؟ وحتي نبسط المسألة للسادة القائمين علي وزارة الاسكان الافاضل نلخص كوارث اوراسكوم في هذه الفضيحة في الآتي: أولا :اختراع نظام جديد للبناء خاصة في الأساسات فبدلا من حقن التربة قبل صب الأساسات قامت بصب الأساسات مباشرة ضاربة عرض الحائط بالطرق الهندسية المعتمدة، الامر الذي قد يسبب خطرا علي المبني حتي لو بارتفاعات صغيرة لأن التربة في هذا المكان تحتاج للحقن حتي لا تسبب ميلا في الأساسات بعد فترة. ثانيا : إن شركة اوراسكوم لم تسدد ثلاثة أقساط علي التوالي منذ استلامها للأرض الأمر الذي يوقعها تحت طائلة مخالفة العقد وبالتالي سحب الأرض من الشركة بما عليها من إنشاءات. ثالثا: إن الاتفاق مع وزارة الاسكان يقضي ببناء وحدات سكنية تكلفتها 50 الف جنيه وليس 8500 جنيه بالمخالفة للاتفاق. رابعا: إن الأرض تم تنظيمها بحيث تكون نصفها للشباب والنصف الثاني للاستثمار علي ان يكون البناء متزامن بين الاثنين، لكن أوراسكوم قامت بالمشروع في بناء الجزء الخاص بالشباب وتسقيع النصف الآخر الاستثماري لحين الانتهاء من الشباب وبالتالي سيكون سعر متر الارض مختلفاً تماما بعد تعمير بقية الارض.

    هذا الموضوع نهديه للسيد أحمد المغربي وزيرالاسكان للبت فيه، فهل يتعامل معه بنفس الحماسة التي يظهرها علي أراضي الغلابة أم ان أوراسكوم “عضمة ناشفة” قد لا يستطيع إعادتها للصواب؟!

13. مجهول قال:
    مايو 19th, 2008 at 19 مايو 2008 7:59 ص

    متهيلى امتع ما فى الامر . هو قراءة تلك المواضيع.. انا لو متاكد ان الشباب معاه الفلوس دى مكنش يبقى عنده ازمة فى حياته.. فى حد يعيش ويموت مديون .. نخيل تقعد عشرين عام بتدفع فلوس لناس بيعومو فى الفلوس بمراكب.. يعنى ربنا ممكن يحاسبنى على الديون دى. لانى مدان بيها .. وعقبال ما اسددها يكون العقار وقع نتيجة انه مبنى على فرشة خرسانية سمكها 9 سم .. يعنى مقدروش يخلوها 12 سم .
    

14. مجهول قال:
    مايو 26th, 2008 at 26 مايو 2008 11:20 ص

    انا عشت 20 سنة فى عمارة 4 ادوار حوائط حاملة من غير ولا عمود واحد و لحد دلوقتى العمارة واقفه و موقعتش مع ان عدا عليها كذا زلزال مدمر اكيد انتوا فاكرينهم ، عموماً انا شايف المشروع ممتاز ، الايجابيات : الموقع رائع - البيت صغير يعنى جيران اقل و ازعاج اقل و ممكن الاصحاب او القرايب ياخدوا مع بعض و بكدة يبقى البيت زى بيت عيله - مهما كانت التكلفة فان الشقق رخيصة جداً حتى لو دفعت فيه 140 الف فالارض لوحدها تسوى كتير - المنطقة الاستهلاكية و منطقة الخدمات اللى فى وسط المشروع هتخلى المشروع ياخد طابع “حى متكامل” زى احياء الاسماعيلية للى يعرفها ، وجود مدرسة شئ جميل - وجود جامع واحد و كنيسة واحدة شئ ممتاز - انا شايف ان الشوارع واسعة و دا كويس جداً- و معتقدش ان البيت ال 4 شقق هيقف قدامه 7 عربيات - المكان عموماً يشبة المصايف - عدم وجود خرسانة بيخلى الشقة باردة فى الحر - انا مش فاكر كل حاجة بس لو بصيتلها من وجهه نظرك هتلاقى مميزات كتيير

    العيوب : مفيش سطح يعنى مفيش فراخ و بط و دى ميزة بس حنحط الدش و الخزان فين ؟ - الشبابيك الارضية منط من الشارع - لا يجوز وضع سور على الحديقة اللى هيا بتاعتك اصلا (ممكن الاحتيال على الموضوع دا بوضع سور شجرى صغير) - مش عارف هينفع نحط تكييف ولا لأ علشان خرم الحيطة - التسليم بعد مدة طويلة .

15. مجهول قال:
    يونيو 13th, 2008 at 13 يونيو 2008 9:36 م

    السلام عليكم فكرة المشروع كويسة رغم انى مش بفهم فى لعبة الأرقام ديه لكن لو كان دفع 5000 مقدم بس والباقى تقسيط والاستلام بعد سنة فدة شئ جميل لأن ديه الفلوس اللى معايا لكن المشكلة هتكون فى مفردات المرتب لأنى بشتغل خاص بدون تعاقد ياريت يكون فيه رد علشان ابدا أعرف هاتصرف ازاى

16. نفسى اتجوز قال:
    يونيو 18th, 2008 at 18 يونيو 2008 6:22 م

    انا اتعس انسان روحت شركة تمويل للتمويل العقارى المدام الى زى القمر قالت ليا طب متسال الاول فى اوراسكوم للاسكان عندهم مشروع حلو اوك روحت قالو مقدم 40 الف وكل شهر 250 وكل سنة حوالى 3500 منين انا مرتبى الف جنيه ؟
    
    مكان المشروع ممتاز اتمنى اسكن هناك بس هو ينفع شركة تمويل للتمويل تمول ليا الشقة بتاعت اوراسكوم واخدها كاش يعنى مثال اوك لو انا معايا عشرين الف تمام وخد تمويل من شركة التمويل خد منهم مثلا 40 اصبح معايا ستين وروحت خد الشقة كاش من اوراسكوم الى هى الدور الى فوق ينفع مع ان الاتنين بتوع سميح سويرس يعنى من تانه وافتلو وكدة كدة انا الى هدفع التمويل
    

17. مجهول قال:
    يوليو 11th, 2008 at 11 يوليو 2008 11:50 ص

    أوراسكوم تهدد بفسخ التعاقد مع المستفيدين من المشروع القومي اسلام حويلة من جريدة الفجر
    
    عند مدخل مشروع اوراسكوم بمدينة 6 اكتوبر توجد لافتة عملاقة ترحب بزيارة السيد الرئيس مبارك للمشروع بعد الانتهاء من إقامة المرحلة الاولي من مشروع مخصص لإسكان محدودي الدخل ضمن محاور المشروع القومي للاسكان وفقا لبرنامج الرئيس الانتخابي كما تشير اللافتة.. وبالطبع تشير اللافتة الي انجازات الشركة غير المسبوقة وحجمها وحجم العمالة في المشروع .. وقامت الجرائد بتغطية كبيرة للزيارة علي صفحاتها ..وبعد ايام من الزيارة فوجيء حاجزو الوحدات ” محدودي الدخل” بخطابات تصلهم من بنك الاسكان والتعمير فرع 6 اكتوبر بتاريخ 25/6/2008 تخطرهم بسرعة سداد مبلغ 20 الف جنيه مصري قبل يوم 10/7/2008، والا ستقوم شركة اوراسكوم بالغاء التخصيص وفسخ التعاقد.

    البنك تصرف كما ينبغي .. ففور استلام احمد مجاهد رئيس قطاع مدير المنطقة الرابعة بالبنك من محمد عبدالغني مدير عام الشئون المالية بشركة اوراسكوم للإسكان التعاوني الذي ارسل صورة من الخطاب لعصام المسلمي مدير فرع البنك في 6 أكتوبر.. قامت ادراة البنك في نفس اليوم بإرسال خطابات لعدد 300 عميل مرحلة ثانية بضرورة دفع الزيادة علي المقدم الحجز الي 30 ألفاً او 35 الف جنيه وذلك طبقا لاتفاق الشركة مع البنك.

    الشركة أمهلت البنك ثمانية ايام لسداد بقية المقدم والا ستقوم بإعادة المبالغ المحصلة السابقة 3.5 مليون جنيه والذي استلمته الشركة بالفعل بتاريخ 8/4/2008 وإلغاء الحجز والرقم الاخير عبارة عن مقدمات حجز300 عميل دفعوا 10 آلاف جنيه و15 الف جنيه بناء علي تعليمات وزراة الاسكان التي تم نشرها بالبنك وتوزيعها علي راغبي الوحدات السكنية من محدودي الدخل.

    حاجزو الوحدات اصيبوا بالصدمة من الخطابات وتوجهوا الي المشروع لمقابلة احد المسئولين لكنهم لم يجدوا احدا وتساءلوا عن معرفة رئيس الجمهورية بهذه الزيادة في المقدمات خاصة انه اشاد بانجاز الشركة من منطلق انحيازه لمحدودي الدخل ، وليس عشقا في مليونيرات عائلة اوراسكوم

    المضحك أن الرئيس مبارك في زيارته الأخيرة لتفقد اعمال المشروع القومي اختار مشروع ساويرس فقط دونا عن بقية مشروعات الإسكان تكريما لهم ، لكن آل ساويرس قرروا رد التكريم علي طريقتهم
    

18. مجهول قال:
    يوليو 11th, 2008 at 11 يوليو 2008 11:53 ص

    قامت بزيادة مقدم الحجز

19. مجهول قال:
    يوليو 14th, 2008 at 14 يوليو 2008 9:03 ص

    2.5 مليار جنيه أرباح سميح ساويرس من مشروع مبارك لإسكان الفقراء!
    
    عبد الفتاح على
    
    أعاد إعلان شركة اوراسكوم للاسكان التعاوني عن المرحلة الثانية من مشروعها السكني ضمن برنامج الرئيس الانتخابي حالة الاستياء والغضب التي انتابت الحاجزين في المرحلة الاولي، واخرج الي السطح الحنق المكتوم وعكس التخبط المستمر في ادارة المشروع القومي للإسكان الذي يرأس جهازه التنفيذي جلال سيد الأهل.

    فقد اعلنت اوراسكوم للإسكان التعاوني عن بدء الحجز لوحدات سكنية تتراوح مساحاتها بين 38 مترا و48 مترا و63 مترا، واشترط الاعلان ان يكون المتقدم من ذوي الدخل المحدود الذي لا يزيد علي 1000 جنيه للاعزب و1500 جنيه للمتزوج.

    لم تكن الصدمة واضحة في الاعلان الذي نشر في اخبار اليوم علي الاقل، فقد اخفي الاعلان اسعار الوحدات السكنية، وانما جاءت عند الاتصال بالرقم المنشور مع الاعلان حيث فوجئ الراغبون في الحصول علي وحدة سكنية بأن الاسعار خرافية وأنها لا تمت لمحدودي الدخل بصلة، ناهيك عن المساحات الصغيرة الاقرب الي القبور منها الي الشقق السكنية.

    فالوحدة التي تبلغ مساحتها 38 مترا ثمنها 60 الف جنيه والوحدة التي مساحتها 48 مترا ثمنها 70 الف جنيه والوحدة التي مساحتها 63 مترا ثمنها 90 الف جنيه .

    هذه الأسعار تتناقض تماما مع ما قاله الرئيس وما أكده برنامجه الانتخابي من ان الشقة مساحتها 63 مترا فقط، وان سعرها 50 الف جنيه وستدعم من الدولة بـ15 الف جنيه ومقدمها لن يزيد علي 5000 جنيه وان القسط لن يتجاوز رقم الـ160 جنيها شهريا، فأين وزارة الإسكان المحترمة من هذا الكلام الفارغ الذي أعلنته شركة اوراسكوم للإسكان التعاوني؟

    لماذا قلنا ان الكلام فارغ؟

    لأن السعر الذي حدده الرئيس تم تغييره، والمساحة التي حددها الرئيس تم تقليصها، والقسط الشهري الذي قاله الرئيس تم نسفه، والدعم الذي حدده الرئيس تم انقاصه لأن الشركة المنفذة قطاع خاص، وبعد كل هذا لم يعد للمقدم الذي حدده الرئيس اي قيمة، فتم مسحه بأستيكة.

    لأنه ووفقا لهذا فإن المستفيد من الوحدة السكنية المتناهية الصغر سيكون اعزب او متزوجا حديثا ولا يعول لأن الوحدة عبارة عن غرفة نوم واحدة وصالة وحمام ومطبخ وبذلك فإن الاعزب عليه أن يدفع مقدما لا يقل عن 35 الف جنيه لأن أقصي قسط شهري سيدفعه وفقا للقانون هو 250 جنيها في الشهر بنسبة 25% من مرتبه الذي لن يزيد علي 1000 جنيه كما سبق وقلنا، في حين أن المتزوج سيدفع مقدما لوحدة سكنية مساحتها 38مترا قدره 27500 لأن اكبر قسط شهري يستطيع دفعه هو 375 جنيها.

    هذا فقط كان «للتربة» عفوا للوحدة السكنية بمساحة 38مترا فقط، في حين أن الوحدة الاكبر مساحة بقليل 48 مترا فثمنها 70 الف جنيه وبالتالي فإن الاعزب مطالب بدفع مقدم لهذه الوحدة الصغيرة قدره 45 الف جنيه مع ثبات قسطه الشهري عند رقم 250 جنيها في الشهر، اما المتزوج فهو مطالب بمبلغ 36 ألفا و500 جنيه.

    الوحدة الاضخم والاكبر والتي يعتبرها سميح ساويرس أنها قصر الفقراء ومحدودي الدخل والبالغة مساحتها 63 مترا، يطالب الاعزب مقابلا لها 65 الف جنيه كمقدم فقط، في حين ان المتزوج سيدفع مقدما لهذا القصر المشيد قدره 56الفا و500 جنيه.

    هل هذه اسعار شقق الفقراء ومحدودي الدخل ؟ هل هذا هو برنامج الرئيس الانتخابي؟ اقصد الرئيس مبارك رئيس مصر وليس الرئيس الفرنسي ساركوزي أو الرئيس الامريكي جورج بوش.

    السؤال العملي الآن: من الذي حدد اسعار هذه الوحدات السكنية التي تحصل علي دعم من الدولة وتأخذ قرضا تمويليا من البنوك؟

    المعروف ان هناك ما يسمي بـ «المقيم»، هذا المقيم عضو جمعية المقيمين والمسجلين في هيئة تسمي هيئة التمويل العقاري التي يرأس مجلس ادارتها اسامة صالح، هذه الهيئة من أحد ادوارها الاساسية الإشراف علي عمليات التقييم هذه، بحيث يذهب المقيم المسجل بالجمعية والمسجل بالهيئة للوحدة المراد ادخالها في نظام التمويل العقاري ويقوم بتقييمها باعتباره خبيرا في هذا الامر.

    ورغم عدم خبرتنا في عمليات التقييم الا اننا استطعنا أن نعرف تكلفة انشاء الوحدة السكنية في مشروع اوراسكوم، وهو الامر الذي فتح امامنا ابوابا للشك والريبة في هذا المشروع، لأن المشروع تم تنفيذه بنظام الحوائط الحاملة الاقل تكلفة من نظام الخرسانة المسلحة، وهذا المشروع لم يدخل فيه سيخ حديدي واحد، وتم تنفيذه بأقل نسبة اسمنت ممكنة استنادا للفكرة العبقرية التي احياها الاستشاري العبقري ممدوح حمزة وهو في الوقت نفسه استشاري المشروع ، وبالتالي فليس هناك مبرر واحد لرفع سعره الي هذا الحد، خاصة أن تكلفة الوحدة الواحدة 63 مترا دون تشطيب لا تتجاوز 9000 جنيه فقط فإذا اضفت اليها 11 ألف جنيه للتشطيب فان السعر لن يتجاوز بأي حال من الاحوال 20 الف جنيه، اضف اليه 5000 جنيه مرافق فان الاجمالي 25 ألف جنيه فقط، فإذا التزم سميح ساويرس ببرنامج الرئيس وباع الشقة بثمن 50 الف جنيه فقط فانه سيكون قد ربح 25 الف جنيه يعني 100% من التكلفة، فما الداعي لكل هذا التربح الفاحش من الفقراء ومحدودي الدخل، لأنه وبحسبة بسيطة فإن قيمة ارباح سميح ساويرس من هذا المشروع ستقدر بـ مليار وربع المليار جنيه. فلماذا اذن المغالاة في السعر ولماذا الرغبة في الحصول علي اكبر ربح ممكن طالما ان الربح وفقا للتكلفة المتواضعة سيكون ضخما جدا؟

    الغريب ان شركة السيد سميح ساويرس هي الوحيدة في محور رجال الاعمال في مشروع الرئيس للاسكان، التي حصلت علي ارض المشروع البالغة 5000 فدان من وزير الاسكان احمد المغربي بـ 20 جنيها للمتر فقط لبناء 50 الف وحدة سكنية، وامام هذه التكلفة المنخفضة جدا فان الربح المتوقع لشركة اوراسكوم للاسكان التعاوني هو كالآتي: اذا افترضنا ان التكلفة ثابتة عند 25 الف جنيه وان متوسط البيع سيكون 75 الف جنيه للوحدة الواحدة فإن اجمالي ما سيجنيه من المشروع 3 مليارات و750 مليون جنيه، متوسط التكلفة مليار و250 مليون جنيه، الباقي سيكون 2.5 مليار جنيه صافي ارباح المشروع.

    المشكلة ان سميح ساويرس لم يكن فريدا في مشروعه، ولم يكن استثناء، بل كان مجرد نموذج سار عليه بقية رجال الاعمال الطامحين في استغلال محدودي الدخل في جني مزيد من الارباح الهائلة.

    هناك أيضا مجموعة رجال الاعمال في مدينة الشيخ زايد علي رأسهم حسام بدراوي وعمرو بدر، وغيرهم كثيرون في مدن جديدة كثيرة، لكن المشكلة ليست في اسماء رجال الاعمال، لكن المشكلة تكمن في كيف يتصرف هؤلاء مع برنامج الرئيس.

    لا أحد يطالبهم بأن يتحملوا مسئولياتهم الاجتماعية، لا احد يطلب منهم ان يكونوا رحماء مع الفقراء ومحدودي الدخل، لا أحد يجبرهم علي ان يكونوا علي قدر الازمة الاقتصادية الصعبة التي تضرب وتعصف بالشرائح الاكبر من المواطنين من غلاء وتضخم وفقر وكساد، لا أحد يدفعهم لرد الجميل لهذا البلد الذي غرفوا من خزائنه وأخذوا منه الغالي والنفيس حتي كونوا ثرواتهم. لكننا فقط نعتقد أن الربح المعقول يجب ألا يتجاوز 20%، خاصة عندما يتعلق الامر ببرنامج رئيس وضع آماله علي عاتق رجال الاعمال الذين قام نظامه بتسمينهم وإغنائهم وإثرائهم.

    كنا فقط نتمني أن يقنع هؤلاء بمكسب 100 % من مشروعات تقام من أجل السلام والامن الاجتماعي، لأن أي عامل في أي مصنع لن ينتج ولن يعطي لو كان يسكن في الشارع، أي موظف لن يحترم الجمهور لو أن أولاده ملقون علي قارعة الطريق، أي انسان قد يصوم وتصوم معه اسرته اذا ما شح الاكل وندر الطعام، لكنه لا يستطيع أن يتحمل عدم وجود شقة آدمية تحمي أهله واسرته وتحميه شخصيا من برد الشتاء وتستر عرضه ولحمه من أعين الناس.

    كنا نعتقد أن رجال الاعمال المحترمين هم من يعتقدون ان أكبر ضمان لأموالهم وأكبر حماية لها وأكبر استثمار لها سيكون في المشاركة في رفع اعباء التضخم والغلاء عن كاهل المواطنين، في المساهمة في تقليل خسائر الازمة الاقتصادية العالمية الخانقة التي تقتل الفقراء وتذبح محدودي الدخل.

    كنا نعتقد أن الرضا بالملايين قد يكون كافيا لهؤلاء، لكن علينا ان نعترف بأننا مخطئون، فرأس المال لا يخشي من الصيد في الماء العكر، رأس المال ليس له دين ..ليس له وطن ..ليس له قلب ..وأيضا ليس له عقل.

20. محمد حافظ قال:
    يوليو 22nd, 2008 at 22 يوليو 2008 12:14 ص

    إللى عايز يعرف المشروع كويس يروح الموقع > خلف الماجيك لاند <

    أو يتصل ب 19370 من 12 الظهر ل 8 مساءاً

21. hazem9595 قال:
    أغسطس 8th, 2008 at 8 أغسطس 2008 7:56 م

    كفاية يا جماعة النظرة التشاؤمية لكل المواضيع أنا من أوائل الناس اللي حجزت في المشروع ده وحجزت في الوقت اللي كان الناس معندهاش ثقة في الناس دول ونظام الحاوئط الحاملة نظام علمي متبع واستشاري المشروع من أكبر الاساتذة المشهود لهم بالكفاءة والموقع أكتر من ممتاز
    
    طبيعي أن ده مشروع بيقوم بيه مستثمر وشركات تمويل عقاري ولما اتعرضت الوحدات بالسعر اللي الناس اشترت بيه في الأول طبيعي لما اي مستثمر يلاقي اقبال كبير على منتجه اكيد هيزود سعره دي تجارة مش حرام زي مشروع الرحاب اول ما اتبنى كان ممكن تاخد شقة وتدفع مقدم 3 الاف جنيه ودلوقت شوف بكام
    
    كفاية تشاؤم المشروع بيشرف عليه ناس فاهمين شغلهم كويس واوراسكوم من الشركات المحترمة جدا ومعروفة في السوق

22. بائسة قال:
    سبتمبر 4th, 2008 at 4 سبتمبر 2008 3:02 ص

    اللي عايزة اعرفه هو ايه وجه التكاتف في المشروع ده - التكاتف ده هو انك ما تضغطش علي الناس بشروطك بس انت كل اللي عليك انك تعرف ايه هي امكانيات الناس وتحاول انك تساعدهم في حدود امكانياتهم ولا هي بس شعارات وخلاص \المهم الشقق غليت كتير انا لسة سأله عليها انهارده لقيتها ال 63 متر وصلت 94 الف للدور الارضي ابو حق انتفاع للجنينة اللي ملهاش سور واللي فوقها وصلت 90 الف من غير بلكونه وال48 متلر وصلت الارضي وصلت 68 الف واللي فوقها وصلت 63 الف الكلام ده يوم 3 رمضان و3 سبتمبر وربنا يجعل كلامي خفيف عليهم وانا اللي كنت فاكرة اني هيبقي عندي شقة خلاص ب 5000 جنيه بتوعي واقسط ان شا الله حتي علي 200 سنة بس من غير مقدم كبير- راح الحلم خلاص واتعقدت من اللي سمعته ومن شركة تمويل ومن كل حاجة-اه بالمناسبة سلألت علي نظام القسط في تمويل لقيته هيديني القرض علي حسب مرتبي وكمان هالمفروض اني ادفع ل اوراسكوم كاش مش تقسيط يعني علي الاقل لازم يكون معايا علي الاقل 45 الف جنيه كاش علي المكبلغ بتاع تمويل عشان اعرف اشتري الشقة بتاعه اوراسكوم -طب بالزمة ده كلام هو انا لو معايا اربعين الف حتي كنت كلفت نفسي كل الوقت ده وكتبت كل الكلام ده وانا اصلا اكاد اكون ميته من التعب بس والله اهم كلمتين في نفسي اللي اتسدت من المبالغ اللي سمعتها -والمطلوب انكم تكسفو جهودكم بالدعاء في ليلة القدر ان ربنا يتولانا برحمته احنا جيل المستقبل قال -وعلي فكرة بغض النظر عن كل ده انا عاجبني موقع المشروع وكمان المشروع ككل ممتاز بس هي مشكلة بسيطة اوي الفلوس بس هي دي كل الحكايةوكل سنة وانتو طيبين وكل مشروع وانتو مملينين

23. مجهول قال:
    سبتمبر 21st, 2008 at 21 سبتمبر 2008 11:07 م

    اولا
    
    الحسبة غلط
    
    فالمتر مش ب 20 جنيه لازم تضيفوا الرشاوى والمحسوبيات والذى منه
    
    هيطلع المتر بحوالى 22.5 جنيه
    
    واصلا تكليف اوراسكوم وغيرها بالاشتراك فى المشروع مدفوعله اشى وشويات
    
    يعنى تكاليف الوحدة مش زى ما الناس حسباها
    
    ثانيا
    
    الحسبة التانية هى كمان غلط
    
    انت هتستلم الوحدة وبعدين هتبيعها من الباطن بالتوكيلات وهتكسب فيها واللى عاملين المشروع فاهمين كده فانت مش هتضحك عليهم وتكلمهم عن الدعم وغيره
    
    وهما عملوا الوحدات صغيرة وفى منطقة شبه راقية ولها مستقبل علشان تعرفوا تبيعوها للاغنياء اللى عايزين يلعبوا بديلهم النجس او فى جوازة من ورا مراته ومش هيهمهم الفلوس اوى لانها مهما كانت ارخص من غيرها ومناسبة من حيث المساحة خاصة 38 متر هتاخد سرير وحمام بس وهو مش مطلوب اكتر من كده
    
    فاحسبوها صح زى اللى اشتروها فعلا والحقوا دوركم
    
    ثالثا
    
    حسبنا الله ونعم الوكيل

24. مجهول قال:
    سبتمبر 23rd, 2008 at 23 سبتمبر 2008 10:31 ص

    انا شايفه ان المشروع ارخص من مشاريع تانيه كتير وخصوصا انى ساكنه فى شبرا وعارفه الاسعار شكلها ايه بس بالرغم من كده تكاليف المشروع كتير علينا انا وخطيبى الفرصه دى عايزه واحد عازب عشان يعرف يحوش كل مرتبه عشان يقدر يدفع الاقساط وممكن الواحد يستلف او يتصرف لان الفرص دى مش بتتعوض خصوصا ان الدنيا بتغلى كل يوم مش بتقل

25. مجهول قال:
    سبتمبر 23rd, 2008 at 23 سبتمبر 2008 3:14 م

    انا شايفة ان المشروع دة كويس بس هما المفروض انهم عملينة للشباب الي داخل علي جواز هي دة المشكلة ان الشاب هيجيب منين المقدم دة كلة وهو لسة وراة عفش وحجات كتير هما المفروض انهم بيسعدو الشباب بس هما كدة بيعقدوهم اكتر هو لو علي الشاب فهو عاوز بقعد في ي مكان بس يكون علي اد المرتب الي هو بياخدة

26. مجهول قال:
    سبتمبر 23rd, 2008 at 23 سبتمبر 2008 8:09 م

    لما يبقى واحد مرتبة 1000 جنيه شهرى وعنده ولد وبنت عندهم 3 سنوات وأمهم ربة منزل عشان نسيب فرصة لشاب يشتغل مكانها لو حسبناها صح
    
    1 — الأكل
    
    كيلو لحمة فى الشهر 40 جنيه
    
    فرخة فى الشهر 25 جنيه
    
    15 كيلو لبن للأطفال مش للكبار فى الشهر 60 جنية
    
    عيش فى الشهر 30 جنيه من العيش السياحى لأنك لو راجل تعرف تجيب العيش المدعم
    
    خضار فى الشهر 70 جنيه
    
    بقالة فى الشهر 60 جنيه سكر وشاى وصابون ورابسو مكرونة وأرز ولوبيا ألخ……
    
    لو هتفرح العيال بحلويات ولا كيس فاكهه قول 40 جنيه فى الشهر

    2 — السكن
    
    مياة تليفون كهرباء بالزبالة اللى محدش بيشلها 100 جنيه
    
    القسط اللى بيقولوا عليه 250 جنيه شهرى 2800 سنوى يعنى قول 500 شهرى
    
    هتركب مواصلات فى الشهر 150 جنيه لوحدك
    
    لو هتدخل العيال حضانة فى المكان ده مش أقل من 1000 سنوى يعنى 100 شهرى

    لو حبيت تفسحهم أنا أسف مش من حقهم على الرغم أن جنبك الماجك والدريم والجليد
    
    لو حبينا نتعالج أنا أسف مش من حقنا نتعالج

    أحسبها صح تعيشها صح سيبك من الكلام والحساب ووجع الدماغ
    
    ربنا يسترنا ويستركم
    
    ورمضان كريم
    
    ضيعوا وقتكم فى الكلام وهما يستغلوا وقتهم فى الثفقات

27. مجهول قال:
    سبتمبر 25th, 2008 at 25 سبتمبر 2008 10:47 ص

    حد حسب تكاليف الدعاية والاعلانات اللى بتتضاف لثمن الوحدات

28. مجهول قال:
    سبتمبر 26th, 2008 at 26 سبتمبر 2008 1:37 م

    سبحان الله في امركم ياجماعه طيب خلاص بلاش من الشقق دي روحو خدو في اي مكان تاني ده لو عرفتو طالما مضايقين اوي من المشروع ، اكيد طبعا لازم برضه المشرع يكسبو منه وده مش عيب بس في الاخر ادوكم فرصه انك تعيشو في مكان نظيف وجديد ورخيص ، ليه الناس مش عارفه تفرح ؟ ليه مش عاوزين تغيرو النظره التشاؤميه دي وان كل حاجه غلط في بلدنا وحتي لو الشقه وقفت عليكم اكتر من المبالغ الي قالو عليها هل برضه بعد الزياده هتلاقو في مكان تاني بنفس السعر؟؟؟؟ حاولو تفكرو بهدوء اكتر من كده وكل واحد عارف مصلحته فين ؟؟ والاخ الي كاتب مصاريف الحياه والله الله يكون في عونك فعلا وكلامك صح بس هنعمل ايه دي بلدنا ولازم نستحمل وعلي ماعتقد ان سنك صغير يعني حاول انك تدور علي شغل تاني وكيف نفسك علي الموضوع بدل ما الواحد يروح يسكن في اي مكان شعبي ولا مكان غالي وياريت اصلا يلاقيله مكان اصلا للسكن !!!!!!!

    معلش هي دي الحياه هنعمل ايه وهي دي بلدنا الي برضه هنفضل نحبها لانها بلدنا!

    علي فكره انا شوفت بس المشروع علي التليفزيون بس معرفش حاجه عنه علي الحقيقه ، وكنت داخله مخصوص ادور عن اي موضوع كاتب عن المشروع لقيت الموضوع ده وقريته وعجبني وقريت الردود فحبيت انا كمان اقولكم رأيي ،ارجو ان تقبلو مني الرد

    ربنا يوفقكم جميعا
    

29. مجهول قال:
    سبتمبر 27th, 2008 at 27 سبتمبر 2008 11:46 ص

    والله العظيم مش عارف اقول ايه يا جماعه تكلفه البناء بنظام الحوائط الحمله رخيص جدا حيث انه من غير حديد وبسيط جدا وبعد كده يلموا اضعاف مضاعفه واللى يقولك افرحوا بالمشروع من الاخر عايز تفرح ارضى ربنا وهو يرضيك سواء فى اوراسكوم او غيره

30. مجهول قال:
    سبتمبر 29th, 2008 at 29 سبتمبر 2008 1:04 م

    محدش قال مايكسبوش انما مش شرط الجيب ومص الدم وبعيد هو لما الوحدة المفروض تتكلف 50000 جينة ودعم كمان 15000 يعنى الموضوع كله المفروض يتكلف 65000 جنيه تكلف هى 8500 وتبيع ب 75 و85 الف جينة يبقى ده حلال ولا حرام غير طبعا المواصفات الى الله اعلم بيها ومتانة المنشأ
    
    انا على فكرة مهندس معمارى صحيح ان نظام الحوائط الحاملة نظام انشاء معترف به انما ليه اصول ياترى الاصول ده بتتطبق سواء من سمكات الحوائط وقوة وصلابة الطوب الى بيبنوا بيه
    
    وبعيد بالعقل كده واحد مرتبه اقل من 1500 اليومين دولا مع الاسعار المولعة فى مصر وسعر السلع الاساسية الى بقت اسعار سياحية والسندويتش الفول والطعمية الى ماعدش الغلبان لاقيهم هايقدر يدفع كل المصاريف ده كلها
    
    استعلام 800
    
    ومصاريف 1500
    
    وتوكيل وكمبيالات وبلى ازرق على عينهم الله يخرب بيتهم
    
    وقسط سنوى 2400 جنية
    
    وقسط شهرى 450 جنية
    
    طيب منين
    
    ياعالم حسوا بقى بالناس حرام عليكم
    
    انا بقبض كويس والمهندسين مرتبهم زادت اليويمن دولا اوى الحمد لله بس برضه موجوع بالنار شوية لسعة خفيفة كده على الماشى بس اكيد مش زى الى بيقبض 1500 وعنده بيت وعيال ومدارس ودروس
    
    حرام بقى حرام
    
    وفى الاخر السؤال الى بيطرح نفسه وماحدش يقول لما مش عاجبك خد فى حتة تانية انما نخاطب المنطق
    
    هل من المنطق والمعقول والمقبول لضمائر القائمين على هذا البلد ان وحدة سكنية بالمواصفات ده لا خرسانة ولا اسمنت ولا حديد من سى عز وبالمسطح ده تتباع باكتر من 100 الف جينة بالتقسيط الممميت المريح الممتص للدم

31. مجهول قال:
    سبتمبر 29th, 2008 at 29 سبتمبر 2008 1:09 م

    على راى محمود عبد العزيز فى فيلم الكيف
    
    الكيف لا هو اكل ولا غذى ولا كساء فعلشان كده لما يببعوا مش هايبقى استغلال
    
    لان الاستغلال على حد تعريفه ليه هو رفع سعر سعلة اساسية زى الغذى والكساء والشرب
    
    ده بقى استغلال ولا مش استغلال هو المسكن ده من سعر اساسية ولا ايه

32. مجهول قال:
    سبتمبر 30th, 2008 at 30 سبتمبر 2008 10:41 م

    السلام عليكم
    
    بصراحه انا لسه داخل وكلى امل فى شقه فى المساكن اللى شكلها حلو فى التليفزيون دى
    
    بس الحمد لله انى اول ما دورت على الشقق دى على النت لقيت الصفحه دى عشان اعرف المهزله دى
    
    كان عندى امل والله فى حبيبنا الاستاذ ساويرس يكون هو اللى ناوى يغيرلنا الفكره على رجال الاعمال فى مصر بس الحمد لله خيب ظنى وطلع ذيهم والحمد لله
    
    اصلى كنت هبدأ اتفائل ان فيه حد بيفكر فى الشباب ومصلحه البلد وهمومها ومشاكلها بس خلاص بقى ربنا يتولانا
    
    قال ايه البرنامج الانتخابى - طيب تصبحول على خير بقى

33. مجهول قال:
    أكتوبر 1st, 2008 at 1 أكتوبر 2008 6:43 ص

    أنا مواطن مصرى مقيم فى الخارج و بعمل فى مجال البنوك للتقسيط العقارى لما بيحضر عميل لطلب قرض من البنك لشراء منزل لا يدفع أى مبلغ فى بداية الأمر مثل 300 جنية بتاعة أستمارة التقديم دى أول نصبة ثانيا أذا سمح بالقرض بيدفع البنك المبلغ كلة لصاحب العقار نقديا و المبلغ بيتقسط على العميل بقسط شهرى و بيكون فى شفافية فى المصاريف البنكية و الفوائد انما انا ملاحظ ان فى موضوع التقسيط فى مصر كلة ضرب على القفة و مصاريف رايحة بدون فايدة كلها خسارة للمشترى و مكسب للشركة بدون ان تبذل اى مجهود يعنى لو فكر العميل كويس الشقة فى الأخر حتقف علية ب 121000 ودة كتير حتى طريقة المقدم المدفوع كتير كتير كتير على الشباب او حتى على موظف بيعول أسرة بعطى نصيحة للعميل و بقولة فتح عينك تاكل ملبن مش حقول اكتر من كدة

34. مجهول قال:
    نوفمبر 15th, 2008 at 15 نوفمبر 2008 9:37 ص

    بداية التقديمة فى الاول كانت 15 الف جنيه دلوقتى وصلت 48 و60 الف ومبالغ غريبه ازاى شاب لسه بادء حياته هيعمل كل ده ليه يعنى هيسرق ولا هيعمل ايه انا ساعات بقول انهم بيهزروا او ان فى ناس كتير معاهم فلوس وانا اللى فقير على الرغم ان مرتبى 1500 جنيه فى الشهر امال اللى بياخد 500 جنيه و700 و800 يعملايه
    
    يمكن هم دارسين السوق اكتر مننا وعارفين ان الشباب معاهم فى بداية حياتهم 60 الف و50 الف والكلام ده يمكن شباب غيرنا ولا حاجة من كوكب المريخ مش عارف بس فين الرحمة بظروف الشباب ربنا يهديهم وينور قلوبهم ويصفيها ده اللى ويسترها معانا

35. مجهول قال:
    ديسمبر 4th, 2008 at 4 ديسمبر 2008 8:32 م

    هذة الشركة قامت بتسليم شقق فى ذلك المشروع الى متضررى الدويقة وعزبة خير اللة وانا شخصيا واخد هناك شقة رحت اشوفها قبل الاستلام لقيت باب الشقة مكسور …..وهى فاضية امال لمال تبقى مليانة بتوع الدويقة حيعملوا اية فينا …..عايزين يبيعوا شقة بميت الف جنية كاش وفى الاخر يكون جارك حرامى اوشغالة او تاجر مخدرات..واذا سالت الشركة وهم اساتذة فى الكذب قالو لك سيتم نقلهم بعد ستة اشهر وطبعا لن يحدث اذن فالحل هو المقاطعةعة وتبصير الناس حتى تتوقف المبيعات ويجبروا على ترحيل هؤلاء الناس الذين لو كنا نعلم انهم سيكونون جيراننا ما كناش هوبنا ناحية المشروع الذى سيكون اسمة علامة على اقذر منطقة فى اكتوبر

اكتب تعليــقك

يجب ان تسجل الدخول لكي تتمكن من التعليق

معا نتكاتف من أجل مساعدة بعضنا البعض فى مشروع أبنى بيتك